КАНИГУТ ПОЛИМЕТАЛЛ КЕНИ

КАНИГУТ ПОЛИМЕТА́ЛЛ КЕНИ Баткен районун­да, Шураб шаарынан 20 км түштүк-батышта, деңиз деңгээлинен 1500–1800 м бийикте. Кен жергиликтүү элге ил­гертен белгилүү. 1948–53-жылдарда чалгындоо, 1989–92-жылдарда издөө иштери жүргүзүлгөн. Кен аймагын палеозой заманында пайда болгон чөкмө тек­тер түзөт. Тоо тектер бүктөлүүгө дуушарланып, синклиналдык түзүлүштү пайда кылган. Поли­металл кени синклиналдык түзүлүштүн түндүк ка­натында, акиташ тектериндеги тектоникалык терең жа­ракаларга топтолгон. Кенташ тулкулары лин­за, уя, тарамча түрүндө, калыңдыгы 20–40 мге жетет. Негизинен галенит, сфалерит, марказит, гематит, пирит, халькопирит, лимонит, гетит, пиролюзит, ярозит ж. б. турат. Кендеги корго­шундун кондициялык өлчөмү 2,3%, цинк – 1,89%. Кен гидротерм процессинен пайда болгон. Запа­сы С₁ категориясы боюнча: коргошун 4,8 миң т, цинк 2,1 миң т; С₂ категориясы боюнча коргошун 4,0 миң т, цинк 1,8 миң т (1952). 1950-жылдан казып алынат. Кендеги күмүштүн запасы С₁+С₂ категориясы боюнча 76,3 т, болжолдуу ресурсу 282,86 т, бардыгы 357,36 т.