КАЛАШНИКОВ Николай Семёнович
КАЛА́ШНИКОВ Николай Семёнович [18. 12. 1913, Россия империясы, Түркстан генерал-губернаторлугу, Жети-Суу облусу, Пишпек (азыркы Бишкек) шаары – 14. 08. 1944, Литва ССРи, Жигарники айылы] – Советтер Союзунун Баатыры (24. 03. 1945, өлгөндөн кийин). 1935-жылдан Советтик Армияда.
Фрунзе айыл чарба техникумун бүтүп (1934), зоотехник болуп иштеген. Ташкенттеги В. И. Ленин атындагы жөө аскер командирлер окуу жайын бүткөн (1938) соң, лейтенант наамы менен ошол окуу жайында сабак берген. Улуу Ата Мекендик согушта 1942-жылы май айынан аткычтар полкунун штаб начальниги, 1943-жылы июлдан 19-танкалык бригаданын мотордошкон батальонунун командири. Гвардиянын майору Н. С. Калашников Белоруссиянын Витебск, Толочин шаарларын бошотууга, душмандардын Орша тобун кыйратууга катышкан. Анын батальону Березина дарыясынан биринчи болуп өтүп, Минскини, Литванын шаар кыштактарын бошотушкан. Н. Калашников 1944-жылы 14-августта баатырларча курман болгон. Каунастагы Ашменос көчөсүнүн № 62-үйүндө, Ташкент аскердик окуу жайында жана Бишкектеги мектеп дубалында ага эстелик такта орнотулган.
Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.