КАВКАЗДЫН КАРА ДЕҢИЗДИК ЖЭЭГИ
КАВКАЗДЫН КАРА ДЕҢИЗДИК ЖЭЭГИ – Кара деңиздин Анападан Грузиянын Түркия м-н чек арасына чейинки чыгыш жээги. Узундугу 800 км. Түндүгүнө Чоң Кавказдын кырка тоолору, түштүгүнө Колхида ойдуңу ж-а Кичи Кавказдын тоолору кирип турат. Түндүк бөлүгүнө Жер ортолук деңиз тибиндеги субтропиктик климат мүнөздүү, жайы кургак, июлдун орточо температурасы 23°С, январдыкы 3°С; түштүгүнүкү нымдуу субтропиктик климат (июлдун орточо температурасы 24°С, январдыкы 5°С). Жылдык жаан-чачыны түндүгүндө 500 мм, түштүгүндө 2800 мм. Түндүгүндө токой ж-а шибляк тибиндеги ксерофиль бадалдары, түштүгүндө лианалуу ж-а дайыма жашыл бадалдуу жазы жалбырактуу токой өсөт. Багбанчылык, жүзүмчүлүк, чай өстүрүү өнүккөн. Кавказдын Кара деңиздик жээги климаттык ж-а бальнеологиялык курорттуу (Анапа, Геленжик, Сочи, Хоста, Гагра, Гудаута, Сухуми, Кобулети, Батуми ж. б.) зона.