КАВАСАКИ
КАВАСА́КИ – Япониядагы шаар. Канагава префектурасында, Токио агломерациясына кирет. Хонсю аралынын борбордук бөлүгүнүн түштүк тарабында, Токио булуңунун батыш жээгинде жайгашкан. Калкы 1,5 млн (2020). Жолдор тоому. Япониядагы ири порттордун бири (жылына 91,4 млн т жүк ташылат). Кисарадзу шаары м-н «Аквалайн» транспорт курулмасы [1989–97; дүйнөдөгү эң узун суу астындагы автомобиль тоннели (узундугу 9,5 км), көпүрөсүнүн узундугу 4,4 км; суткасына 23 миңге жакын автомобиль өткөрө алат] м-н байланышат. Алгач 17-кылымдан эскерилет. Хейкендзи будда (1127; жылына 2–3 млн адам зыяратка келет), Вакамия-Хатиман синтоист храмдары, университеттер, музейлер, табигый-илимий планетарий (балдар үчүн) бар. Маанилүү өнөр жай борбору. Нефть ажыратуу, нефть-химия, тамак-аш, транспорттук машина куруу (анын ичинде кеме куруунун ири борбору), электр-техника, электроника ж-а атом өнөр жайы үчүн жабдуу чыгаруучу ишканалары, болот куюучу заводу иштейт. Зоопарк, парк (анда ачык асман астындагы этнографиялык музейи уюштурулган), Дайси паркында Япониядагы кытай стилиндеги «Синсю-Эн» (1987) эң ири ландшафт багы, корей кварталы бар.