ИШКЕРДИК

ИШКЕРДИК – рынок мамилелеринин өзгөчө атрибуту. Рынокко өтүү чарбалык ишкердиктин субъекттеринин ишкер демилгелеринин өсүшүн бол­жолдойт. Өнүккөн рынок ишкердиктин өнүгүшү үчүн жагымдуу шарт түзөт. Негизги түрлөрү: 1) өндү­рүштүк; 2) коммерциялык; 3) финансылык. Өндүрүштүк ишкердик андан ары керектөөчүлөргө са­тылуучу товарларды‚ жумуш‚ кызмат көрсөтүү­нү‚ маалыматтык‚ рухий байлыкты өндүрүүчү өндүрүш фазасын ж-а керектөө фазасын кам­тыйт. Коммерциялык ишкердикте товар-акча‚ соода ­алмашуу операциялары ж-а бүтүмдөр чечүүчү мааниге ээ‚ башкача айтканда товарларды ж-а кызмат көрсө­түүнү соодалоо ишин жүргүзөт. Финансылык ишкердикте сатып алуу-сатуу объекти болуп өзгөчө товар – акча‚ валюта‚ баалуу кагаздар эсепте­лет. Ишкердиктин бардык эле түрүнө пландар ж-а про­граммалар керек. Бизнес-план – бул бүтүмдөрдү ишке ашыруунун ж-а анын негизинде пайда та­буунун план-программасы‚ башкача айтканда коюлган мак­саттарга жетүүгө багытталган пландуу иш-ча­ралардын‚ аракеттердин системасы.