ИОАНН ПАВЕЛ
ИОА́НН ПА́ВЕЛ II, К а р о л ь Ю з е ф В о й т ы л а (18. 5. 1920, Польша, Вадовище шаары– 2. 4. 2005, Рим) – 264-шайланган Рим папасы (1978–2005), саясий ж-а коомдук ишмер. 1958-жылы Краков епископу, 1964-жылы архиепископу ж-а митрополити. 1967-жылы кардинал наамын алган. 1523-жылдан бери италян эмес улуттан Рим папасы болгон биринчи киши. Марцин Вадовите атындагы гимназияны бүткөндөн (1938) кийин, Краков шаарындагы Ягелон университетинин философия факультетине тапшырган. 2-дүйнөлүк согушта Польшаны немистер басып алганда университет жабылып калган. Ал жашырын иштеген Рапсодия театрын уюш-
туруунун демилгечилеринен, актёр ж-а режиссёр, ошондой эле шахтада, «Солвей» концернинин химиялык өндүрүштүк мекемесинде жумушчу болуп иштеп, дин семинариясына катышып турган. Кийин Рим, Швейцария ж-а Бельгия университеттеринин философия факультетинде окуган. 1948-жылы өз мекенине кайтып келип, Краков, Католикалык университеттеринде иштеп, теология илимдеринин доктору наамына ээ болгон. Философия ж-а теология илимдери боюнча көптөгөн эмгектердин автору. Ал ар түрдүү диндеги мамлекеттердин тынчтыкта жанаша жашоосуна, дүйнөлүк диндердин ж-а алардын тармактарынын өз ара жакындашуусуна зор салым кошкон. Рим папаларынын арасынан биринчи болуп чиркөөлөргө ж-а мечиттерге расмий жолугушууларга барган.