ИНТЕРПЕЛЛЯЦИЯ
ИНТЕРПЕЛЛЯ́ЦИЯ (лат. interpellatio – «сөздү бөлүү», «сотко арыз берүү») – өлкөнүн тышкы же ички саясаты туурасында же кайсы бир конкреттүү мамлекеттик маселелер боюнча түшүндүрмө берүүнү талап кылып, өкмөткө кайрылган депутаттык суроо-талап. Интерпелляция көбүнчө коомдо олуттуу тынчсыздандырууну туудурган кандайдыр бир факт боюнча жасалат. Ошондуктан интерпелляция жалпы талаш-тартышты, андан соң саясий санкцияны: министр берген түшүндүрмөнүн канааттандырганын же канааттандырбаганын чагылдырган добуш берүүнү туудурат. Кээ бир учурларда талаш-тартыш министрге же өкмөттүн бардык курамына ишенбөө жөнүндөгү суроону киргизүү м-н аякталат. Интерпелляция маалымат алуунун гана күчтүү ыкмасы болбостон, депутаттар тарабынан тике көзөмөлдөөнүн күчтүү формасы болуп саналат.