ИЛБЭЭСИН

ИЛБЭЭСИН – эт, мамык алынуучу жапайы куш­тардын жалпы аты, аңчылык объектиси. Жашаган жерине жараша токой (кара кур, ак чил ж. б.), талаа (боз чил, бөдөнө, кыргоол, тоодак, безбелдек ж. б.), саз (эчки маарак ж. б.), суучул (өрдөк, каз ж. б.), тоо (улар, кекилик ж. б.) илбээсиндери болуп бөлүнөт. КМШ өлкөлө­рүндө илбээсиндин 170 түрү (13 түркүмгө биригет) бар. Кыргызстандагы эң маанилүү илбээсиндер: каз, өрдөк, улар, кекилик, чил, кереңкур, бөдөнө, кыргоол ж. б. Өлкөдө токой ж-а дың жерди өздөштүрүү, саздак жерди кургатуу, айыл чарбасын химиялашты­руу ж. б-га байланыштуу илбээсиндердин саны азайып кеткендиктен, аларды көбөйтүү максатын­да коруктар уюшулган. Айрым илбээсиндерди (кеки­лик, чил, кереңкур ж. б.) өстүрүүчү атайын фер­ма, питомниктер бар, к. Аңчылык, Аңчылык чар­басы.

Ад.: Птицы Советского Союза. Т. И-6. М., 1951– 54; Птицы СССР. М., 1982; Шукуров Э. Д. Птицы Киргизии. Часть I, II. Ф., 1981.