ИВАНОВ Мстислав Борисович
ИВА́НОВ Мстислав Борисович [03. 01. 1924, СССР, РСФСР (азыркы Россия Федерациясы), Кострома шаары) – 20, 04. 2014, Кыргыз республикасы, Бишкек шаары] – Даңк орденинин толук кавалери. Үй-бүлөсү менен Өзбек ССРинин Самарканд облусунун Катта-Коргон шаарына көчүп келип, ушул жерден мектепти аяктаган. Советтик Армиянын катарына 20. 09. 1942-жылы чакырылып, Улуу Ата Мекендик согушта Воронеж, Талаа жана 2-Украин фронтторунда салгылашкан. Курск салгылашында (1943) жарат алып, Украина, Румыния, Венгрия, Австрия жана Чехословакияны душмандан бошотууга катышкан. Мезентур шаарына (Венгрия) жакын жердеги согуш майданында көрсөткөн
эрдиги үчүн 21. 11. 1944-жылы взвод командири сержант М. Б. Иванов 3-даражадагы (№ 131378), Грон өзөнүнөн (Словакия) өтүүдөгү күжүрмөн каармандыгы үчүн 08. 02. 1945-жылы 2-даражадагы (№ 6019), 04. 04. 1945-жылы Чехословакиянын Братислава шаарынын түндүгүндө чалгынчылар тобу менен күтүүсүз көрсөткөн эрдиги үчүн 1946-жылы 15-майда 1-даражадагы (№ 1434) Даңк ордендери менен сыйланган. 1950-жылы А. Навои атындагы Өзбек мамлекеттик университетин бүтүргөн соң, Кыргызстанга жиберилген. 1950–1979-жылдарда Кыргыз ССР геология башкармалыгында инженер-геолог болуп эмгектенген. 3-даражадагы «Манас» (2000), Кызыл Жылдыз, 1-, 2- даражадагы Ата Мекендик согуш ордендери менен сыйланган.
Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.