ЖООН-АРЫК

ЖООН-АРЫК – Кочкор районундагы чоң суу. Тес­кей Ала-Тоонун түштүк капталынан башталган Кара-Кужур жана Төлөк сууларынын кошулушу­нан пайда болот. Узундугу 34,8 км, алабынын аянты 1340 км². Кочкор суусу менен кошулуп, Чүй дарыясын түзөт. Ири куймалары: Кара-Кокту, Чалай, Кара-Кужур, Төлөк. Мындан башка 60тан ашык майда куймасы бар. Алабында жалпы аянты 0,15 км² келген 2 көл жатат. Жылдык орточо чы­гымы 11,4 м³/сек; байкалган эң көп чыгымы 131 м³/сек, эң азы – 1,97 м³/сек. Апрелде ки­рип, августтун аягында тартылат. Сугатка пай­даланылат, андан ондон ашык сугат каналда­ры башталат. Жээгинде Сары-Булак, Көк-Жар кыштактары жайгашкан. Айрым учурларда Жоон-Арыктын Кочкор суусуна куйган жерлер да ушундай тарыхый топоним менен аталат (кара: Жоон-Арык капчыгайы). 1926-жылдагы Кыргызстанды райондоштуруу боюнча Кыргыз БАКнын чечимине ылайык өзүнчө Жоон-Арык болуштугу түзүлүп, 1929-жылга чейин ушул аталышты алып жүргөн.