ДӨРӨ АШУУСУ

ДӨРӨ АШУУСУ Күнгөй Ала-Тоонун батышын­да. «Дара», «Дөрө» (дөре, дора, дере, торо, төрө) түрк тилинде «татаал же кууш өткөөл» (ашуу), «терең жар» деген маанини билдирет. Ашуу Дөрө суусунун башында. Бийиктиги 3734 м. Тоо кырларынын ашуудан салыштырмалуу би­йиктиги 200–300 м. Ысык-Көлдүн деңгээлинен са­лыштырмалуу 2114 м жогору жатат. Ашуу нео­генге чейинки түздүктүн тектоникалык жарака боюнча ийилген жеринде пайда болгон. Каледондун гра­нит, гнейс, сланец, мрамор, гранит-диорит тек­теринен түзүлгөн. Түндүк Дөрөнүн төрүндө 3640 м бийикте мөңгү (аянты 2,4 км²) жатат. Андан башталган Дөрө суусу Чоң Кеминге куят. Ашуунун түндүк бети тик, аскалуу, түштүгү аска­луу, корум таштуу, мореналуу. Ашуу аркылуу Ысык-Көл районунан Көк-Ойрок жайлоосуна мал ашырылат. Бишкек, Алматы шаарларынан келүүчү туристтердин туруктуу жолуна айланды. Ок­тябрь – май айларында ашууну кар басып, жа­былат.