«КИТАБ ал-АГАНИ»
«КИТАБ ал-АГАНИ» («Ыр китеп») – араб поэзиясынын антологиясы. Адабиятчы, акын, тарыхчы, Абу-л-Фарадж ал-Исфахани (897–967) түзгөн. Китепке 7–10-кылымдардагы араб акындарынын ырларына жазылган Ибраим ал-Маусили, Исмаил ибн Жами ж-а Фулайха ибн ал-Аврдын музыкасы кирген. «Китаб ал-Аганиде» акындардын өмүр баяндары, композиторлор м-н белгилүү аткаруучулар тууралуу маалыматтар камтылган. Түзүүдө кемчиликтер кетирилгени м-н, бул китеп 10-кылымга чейинки арабдардын ж-а араб тилинде сүйлөгөн элдердин адабияты, маданияты ж-а үрп-адаты тууралуу маалыматтарды камтыган баалуу эмгек. «Китаб ал-Аганини» немис илимпозу Козергартен 10 том кылып чыгармак болуп, анын 1-тому гана жарык көргөн (1868–69). Китеп толугу м-н 21 том болуп, 1904-жылы Каирде басылып чыккан.
Ад.: Крымский А. Е. История арабов и арабской литературы. Т. 1–3. М., 1911–13.