«ИНТЕРНАЦИОНАЛ»

«ИНТЕРНАЦИОНА́Л» (фр. L’Internationale, лат. inter – аралык, nаtion – эл) – эл аралык проле­тариаттын, компартиялардын гимни. Текстин франциялык акын Э. Потье 1871-жылы жазган. Музыкасы франциялык композитор П. Дегейтердики. «Интернационал» алгач ирет 1888-жылы 23-июнда Франциянын Лилле шаарында жумушчулар майрамында ырдалган. Россияга 20-кылымдын башында падышалык өкмөт тыюу сал­ганга карабай тарала баштаган. Орусчага рево­люционер акын А. Я. Коц 1902-жылы которгон. Улуу Октябрь революциясы жеңгенден кийин «Интернационал» совет мамлекетинин гимни болгон. 1944-жылы СССРдин жаңы мамлекеттик гимни бекитилгендигине байла­ныштуу ВКП(б) БКнын пленуму «Интернацио­налды» Бүткүл союздук коммунисттик (боль­шевиктер) партиясынын гимни катары сак­тоо...» жөнүндө токтом чыгарган. «Интернационалдын» кыргыз тилиндеги туңгуч котормосу 1925-жылы жарыялан­ган, кийин акындар (А. Токомбаев, У. Абду­каимов) тарабынан кайрадан которулган.