АЙДАРАЛИЕВ Акматбек
АЙДАРАЛИЕВ Акматбек (1916, Чүй облусу, Аламүдүн району, Кайырма кыштагы – 1987, Фрунзе шаары) – медицина илимдеринин доктору (1959), профессор (1960). Кыргыз ССРинин эмгек сиңирген врачы (1948). Кыргыз ССРинин илимге эмгек сиңирген ишмери. Ташкент медицина институтун бүтүргөн (1939), ошол эле жылдан Нарын облустук саламаттык сактоо бөлүмүнүн, Пржевальскидеги шаардык поликлиниканын башчысы (1941‑43), Кыргыз ССР Саламаттык сактоо министринин орун басары (1947‑50), КММИнин директору (1952‑55), Кыргыз ССР Саламаттык сактоо министри (1960‑63), 1963-жылдан КММИде кафедра башчысы болгон. Анын илим-изилдөө иштери көз ооруларын жана саламаттык сактоонун тарыхын, санитария маселелерин изилдөөгө арналган. Эмгек Кызыл Туу, «Ардак Белгиси» ордени жана медалдар менен сыйланган.
Эмг.: Кыргызстандын саламаттык сактоо ишинин негизги өсүш этаптары. Ф., 1958; Библиографические материалы по здравоохранению и истории Киргизии.Ф., 1962; Советтик Кыргызстанда саламаттык сактоонун өсүшү. Ф., 1970.