АБШЫР-САЙ (суу)

АБШЫР-САЙ иран тилдеринде: 1) об/аб – суу, шир – сүт, кыргызча – сай; ак көбүктөнгөн суу; 2) обшир – шаркыратма; шаркыратмалуу сай. Ош облусундагы суу. Кара-Дарыянын алабында. Узундугу 62 км, алабынын аянты 230 км². Кичи Алай кырка тоосунан башталат. Жогорку бөлүгүндө кууш жана терең капчыгай аркылуу агып, Найман кыштагынан кийин Фергана өрөөнүнө чыгат. Төмөнкү агымы Жылгын-Сай аталат. Ортоңку агымында Абшыр-Сай шаркыратмасы, 89 чакан куймасы бар, ирилери: Маляран, Ширан жана башкалар. Апрелде кирип, августта тартылат. Жылдык орточо чыгымы 1,68 м³/сек; эң көбү – 13,0 м³/сек, эң азы 0,51 м³/сек. Сугатка пайдалангандыктан, Кара-Дарыяга жетпейт. Боюнда Көтөрмө, Найман кыштактары жайгашкан.