КЛИМАТТЫК ОПТИМУМ
КЛИМАТТЫК О́ПТИМУМ – төртүнчүлүк мезгилдин муз каптоолор аралыгындагы ж-а алардан кийинки убактагы климаттын жылуулугу. Акыркы климаттык оптимум палеонтологиялык ж-а геологиялык маалыматтар боюнча голоценде (мындан 6,2–5,3 миң жыл мурун) байкалган. Климаттык оптимумда бүткүл планетада жылуу ж-а нымдуу климат өкүм сүргөн, мелүүн алкактын токой зонасы болжол м-н 5° түндүккө жылган, каралжын ийне жалбырактуу токойлор Баренц деңизинин жээгинде өсүп, Азияда тайга Челюскин тумшугуна чейин жеткен, Сахараны саванна ээлеп, Чад көлүнүн деңгээли 40 мге көтөрүлгөн. Муз эрип, тез чегинген. Дүйнөлүк океандын деңгээли көтөрүлгөн.