АЛИЕВ Чыныбек

АЛИЕВ Чыныбек Тукешович (15. 01. 1961, СССР, Кыргыз ССРи, Ысык-Көл облусу, Тоӊ району, Төрткүл айылы ‒ 05. 05. 2004, Бишкек шаары) ‒ милициянын генерал-майору.

Фрунзе шаарындагы финансы-экономика техникумун (1978), Кыргыз Мамлекеттик университетинин юридика факультетин (1991) бүтүргөн. 1978‒1991-жылдары Тоӊ райондук аткаруу комитетинде текшерүүчү, экономист, Аламүдүн райондук ички иштер бөлүмүндө инспектор, улук оперуполномочен, кылмыш издөө бөлүмүнүн начальниги, 1991‒1995-жылдары Кыргыз Республикасынын Ички Иштер министрлигинин региондор аралык башкармалыгында улук оперуполномочен, 2-бөлүмдүн начальниги, экономикалык кылмышка жана коррупцияга каршы күрөшүү башкы башкармалыгында 3-бөлүмдүн начальниги, 1995‒2004-жылдары Бишкек шаардык ички иштер башкармалыгынын начальнигинин орун басары, Кыргыз Республикасынын ИИМдин Кызматтык кылмыштар менен күрөшүү башкы башкармалыгынын начальниги болуп иштеген. Кыргыз Республикасынын ИИМинин Даӊк мемориалына ысымы жазылган. «Эрдик» жана башка медалдар менен сыйланган.