КИЧИ КЫЗЫЛ-СУУ
КИЧИ КЫЗЫЛ-СУУ – Тескей Ала-Тоонун чыгыш бөлүгүнүн түндүк капталынан агып түшкөн суу. Ысык-Көлдүн куймасы. Жети-Өгүз районунда. Узундугу 37 км, алабынын аянты 139 км2. Суу куралуу аянтынын орточо бийиктиги 2930 м. Кичи Кызыл-Сууга узундугу 21 км болгон 9 суу куят. Көп жылдык орточо чыгымы 1,25 м3/сек. Май–сентябрь айларында кирип, октябрь–апрель айларында тартылат. Июль айы сууга мол (орточо чыгымы 3,2 м3/сек), декабрь – февралда сууга өксү (0,4 м3/сек) болот. Эң көп чыгымы 45 м3/сек, эң азы 0,08 м3/сек. Декабрдын ортосунда муз каптап, марттын аягында ачылат. Муздун калыңдыгы 25–40 смге жетет. Сугатка пайдаланылат. Кичи Кызыл-Суудан 3 м3/секга жакын суу өткөрүүчү 8 канал чыгарылган. Өрөөнүндө Кызыл-Суу кыштагы жайгашкан.