АБДЫБЕКОВ Садырбек

АБДЫБЕКОВ Садырбек [1871, Россия империясы, Түркстан генерал-губернаторлугу, Жети-Суу (азыркы Ысык-Көл) облусу, Тору-Айгыр болуштугу – 1950, СССР, Кыргыз ССРи, Ысык-Көл облусу, Түп (азыркы Ак-Суу) району, Жол-Колот айылы] – мергенчи, натуралист, саякатчы, тилмеч. 18-кылымдын аягынан тартып орус (А. А. Куценко, 1901; В. Н. Шнитников жана башка) жана чет өлкөлүк (Д. Алмаши, 1900; Г. Мерцбахер, 1902-03; Д. Принц, 1906 жана башка) илимий экспедицияларга катышкан. Алар менен Теңир-Тоонун Күнгөй-Тескей, Сары-Жаз, Көөлү, Арпа, Суусамыр, Балгарт жана башка көп жерлерин (1890–1943), Иле өрөөнүн (1909, 1912-1913), Балкаш көлүнүн жээктерин (1913), Жунгар тоолору менен Ала-Көлдү (1914), Күнөс, Текес, Борохорону (1916-21) жана башка жерлерди кыдырып чыгып, Россиянын (Москва, Петербург) жана чет өлкөлөрдүн (Будапешт, Лондон, Мюнхен жана башка) бир топ музейлерин көп сандаган коллекциялар менен жабдыган. Кыргызстанда мамлекеттик аңчылыкты уюштуруучулардын бири. Аңчылар союзунун башкармасына шайланган. 1930-жылдан баштап Пржевальскидеги чумага каршы станциянын илимий кызматкери катары бир нече экспедицияга катышкан. Фрунзе (1926) жана Пржевальск шаарларындагы (1928–1929) мекен таануу музейлерин уюштурууга катышып, аларга өзү даярдаган коллекцияларын берген. Кыргыз жергесин, анын табиятын, өзгөчө айбанаттарын жакшы билген.

Ад.: Умурзаков С. С четырех сторон горизонта. Фр., 1983.