АРЫНБАСАРОВА Наталья Өтеул кызы

АРЫНБАСАРОВА Наталья Өтеул кызы (24. 9. 1946-ж. т., Москва ш.) – киноактриса, РСФСРдин эл артисти (1998), Казакстандын эмгек сиңирген артисти. Москва хореография окуу жайын (1964), ВГИКтин актёрлук факультетин (1974) бүтүргөн. Кино ишмердигин кыргыз фильмдеринде тартылуу менен баштаган. «Биринчи мугалим» (реж. А. С. Михалков-Кончаловский, 1965) кинофильминде Алтынайдын ролун чоң драматизм менен психологиялык кылдаттыкта ойногон (Венецияда эл аралык кинофестивалдын сыйлыгын алган). «Жамийла» (реж. И. Поплавская, 1969), «Эски тегирмен» (реж. Ү. Ибрагимов, 1972), «Улан» (реж. Т. Океев, 1977) ж. б. фильмдерине тартылган. Н. Арынбасарова СССР Ленин комсомолу сыйлыгынын лауреаты (1978).