АНГИДРИТ

АНГИДРИТ – минерал, сульфаттар классына кирет. Химиялык формуласы Са(S0₄). Ромб сингониясында кристаллданат. Өңү ак, бозомук, көгүш, кызгылт. Майда бүртүкчөлүү көгүш түрү вульпинит же бергам мрамору деп аталат. Айнек сымал жалтырак. Катуулугу Моос шкаласы боюнча 3–3,5, тыгыздыгы 2980 кг/м³. Салыштырма салмагы 2,8–3. Сууга тийсе ным тарткандыктан көлөмү 30% ке чейин чоңоюп, гипске айланат. Ангидрит негизинен чөкмө түрүндө, кээде гидротерм жолу менен пайда болот. Жер семирткич катарында, цемент даярдоодо жана кооздук үчүн майда буюмдарды жасоодо пайдаланылат.