АК-КОРГОН
АК-КОРГОН – Жалал‑Абад облусунун Ала‑Бука районундагы кыштак. Ак‑Коргон айыл аймагынын борбору. Райондун борбору Ала‑Бука кыштагынан 17 км түштүк-чыгыш тарапта. Наманган темир жол бекетинен 65 км. 1900‑жылга чейин отурукташкан. Деңиз деңгээлинен 1180 м бийиктикте жайгашкан. Калкы 8 175 (2022); негизинен дыйканчылыкта, мал чарбасында эмгектенет. Орто мектеп, лицей, китепкана, эки бала бакча, маданият үйү бар. Турмуш‑тиричилик комбинатынын бөлүмдөрү, оорукана, дарыкана, тегирмен, май чыгаруучу цех иштейт. Улуу Ата Мекендик согушта курман болгондорго эстелик тургузулган.