АЙЫЛ ЧАРБАСЫН МЕХАНИКАЛАШТЫРУУ
АЙЫЛ ЧАРБАСЫН МЕХАНИКАЛАШТЫРУУ – айыл чарба өндүрүшүндө трактор, комбайн жана башка машинелерди жана шаймандарды колдонуу жолу менен кол эмгегин механикалаштыруу процесси. Мында жер кыртышын терең айдоо, бир эле убакта үрөн себүү жана жер семирткич чачуу, өсүмдүктөрдү азыктандыруу жана башка жумуштарды аткарууга мүмкүнчүлүк түзүлөт. Айыл чарба өндүрүшүн механикалаштыруунун негизинде эмгек өндүрүмдүүлүгү 5‑6 эсе өсүп, күч жумшоо 4 эсе төмөндөйт. Айыл чарба өндүрүшүндө асма машиналары жана шаймандары чиркеме машиналарга караганда көп колдонулат. Анткени асма машиналар жеңил келип, колдонууга ыңгайлуу. Мында тартуу күчү аз талап кылынат жана агрегат тез-тез бурулуп иштөө кыймылы жогору. Натыйжада күйүүчү май 10-15% ке аз сарпталат. Айыл чарбасын механикалаштыруунун теориялык жана эксперименттик негиздерин орус илимпозу ВАСХНИЛдин академиги В. П. Горячкин биринчи болуп түзгөн. Тоют даярдоодо тоют иштетүүчү, таратуучу жана сапатын текшерүүчү өзү жүрмө машиналар колдонулат. Механикалаштыруунун эң жогорку түрү – айыл чарба өндурүшүн автоматташтыруу менен катар электрондук-пландоо жана башка эсеп-кысап иштери да механикалаштырылат. Ы. Ж. Осмонов.