КАРЫПКУЛОВ Аманбек
КАРЫПКУЛОВ Аманбек [19. 06. 1939, СССР, Кыргыз ССРи, Фрунзе (азыркы Талас) облусу, Талас району, Кара-Суу айылы – 15. 10. 2008, Кыргызстан, Бишкек] – философ, партиялык жана мамлекеттик ишмер, философия илимдеринин доктору (1983), профессор (1994), Кыргыз Республикасынын Улуттук илимдер академиясынын академиги (2000), корреспондент мүчөсү (1979), Кыргыз Республикасынын илим жана техника жаатындагы мамлекеттик сыйлыгынын лауреаты (1998). Талас айылдык кесипчилик-техникалык окуу жайын (1957), Пржевальск (азыркы Каракол) педагогикалык институтун (1962) бүтургөн. 1962–1964-жылдары Пржевальск педагогикалык институтунда окутуучу, 1967–1968-жылдары Кыргыз мамлекеттик университетинин философия кафедрасында окутуучу, 1968–1973-жылдары Кыргызстан Коммунисттик партиясынын Борбордук комитетинин илим жана жогорку окуу жайлар бөлүмүнүн инструктору, бөлүм башчынын орун басары, 1973–1983-жылдары бөлүмдүн башчысы, 1983–85-жылдары Кыргызстан Коммунисттик партиясынын Борбордук комитетинин секретары, 1985–1986-жылдары Фрунзе (азыркы Бишкек) политехника институтунда илимий коммунизм кафедрасынын профессору, 1986–1992-жылдары Кыргыз педагогика илимий-изилдөө институтунун жетектөөчү жана башкы илимий кызматкери, 1992–1996-жылдары Кыргыз энциклопедиясынын башкы редактору жана аны менен кошо 1994–1996-жылдары Кыргыз Республикасынын мамлекеттик «Акыл» концернинин башкармасынын төрагасы,
1996–2001-жылдары Кыргыз Республикасынын улуттук телерадио комитетинин президенти, 2001–2002-жылдары Кыргыз Республикасынын Президентинин администрация башчысы, 2002–2005-жылдары Кыргыз Республикасынын Түркия жана Македониядагы атайын жана толук ыйгарымдуу элчиси, 2005–2008-жылдары Кыргыз-Россия Славян университетинин билим берүү жана маданият борборунун директору болуп иштеген. Кыргыз ССР Жогорку Советинин бир нече жолу чакырылышынын депутаты, Кыргыз ССР Жогорку Советинин төрагасы (1985). 80ден ашуун илимий эмгектин (анын ичинде 8 монография) автору. Эмгектери негизинен өнүккөн социализмдин маданий жактан өнүгүү маселесине, совет элинин калыптануусунда илимдин жана жалпы билим берүүнүн ролуна арналган. 2 Эмгек Кызыл Туу ордени менен сыйланган.
Эмг.: Народное образование в развитом социалистическом обществе. Ф., 1982; Изучение русского языка и народное образование в Советской Киргизии (на англ. яз.). США, 1985; Өнүккөн социалисттик коомдо элге билим берүү. Ф., 1985; Интернациональное воспитание в средней школе в условиях обновления общества. Б., 1991.