КУБА РЕВОЛЮЦИЯСЫ
КУ́БА РЕВОЛЮЦИЯСЫ – элдик, антиимпериалисттик жана антифеодалдык рев-я (1956–59). Рев-янын чыгышына ири жер ээлеринин зомбулугу, элдин жакырланышы, укуксуздугу, улуттук экономикага АКШнын капиталынын кысымы ж. б. себеп болгон. Куба коомундагы карама-каршылык Батистанын коррупция диктатурасы орногондон кийин (1952) өзгөчө күч алган. Ушундай шартта Ф. Кастро Рус жетектеген жаштар тобу 1953-ж. 26-июлда Монкада аскер казармасына (Сантьяго-де-Куба ш.) кол салып, жеңишке жетпей, камакка алынган. Андан бошонгондон кийин (1955) алар Мексикага эмиграцияга кеткен. 1956-ж. декабрда Сьерра-Маэстра тоосунда Ф. Кастро, Р. Кастро жана аргентиналык Эрнесто Че Гевара башында турган рев-ялык топ түзгөн партизандык отряд бара-бара армияга айланып, чабуулга өткөн. 1959-ж. 1-январда Батистанын өкмөтү кулап, Убактылуу өкмөт бийликке келген. 1959-ж. февралда рев-ялык өкмөттүн башына Ф. Кастро келген. К. р-нын натыйжасында латифундиялар системасын жойгон агр. реформалар жүргүзүлгөн, а. ч-нда мамл. сектор түзүлгөн. АКШнын компаниялары менен жерг. ири жана орто буржуазиялардын жеке менчиктери мамлекеттештирилип, өндүрүш каражаттарынын бардыгы элдик менчикке өткөн. Рев-янын өнүгүү процессинде өлкөнүн бардык рев-ячыл күчтөрүнүн биримдиги түзүлүп, Куба элинин бирдиктүү рев-ялык партиясы пайда болгон.