КАЙКИН
КА́ЙКИН Василий Матвеевич [09. 06. 1910, Россия империясы, Түркстан генерал-губернаторлугу, Жети-Суу (азыркы Ысык-Көл) облусу, Пржевальск уезди (азыркы Түп району), Түп айылы – 30. 01. 1945, Германия, Альткессель темир жол бекети] – гвардиянын
улук сержанты, Советтер Союзунун Баатыры (27. 02. 1945, өлгөндөн кийин). Советтик Армиянын катарына 1942-жылы чакырылган. Улуу Ата Мекендик согушта Кызыл Туулуу Мозырь гвардиялык атчандар дивизиясынын 54- гвардиялык атчандар полкунун пулемёт расчётунун командири. Сталинград, Борбордук жана 1-Белорус фронтторунда салгылашкан. В. М. Кайкиндин расчёту 1945-жылы 29-январда Зелёна-Гура шаарына (Польша) жакын Одер дарыясын кечип өтүүдө душмандын 6 чабуулунун мизин кайтарган, душманды коргонуп жаткан жеринен кууп чыгып, эскадрондун дарыядан өтүшүнө шарт түзгөн. Кийинки күнү Германиядагы Альткессель (Альткассел) темир жол бекетин алуу үчүн салгылашта 100дөй фашистти жок кылып, душмандын ок-дары жүктөлгөн 7 автомашинасын талкалаган. Ок-дарысы түгөнүп, душмандын курчоосунда калганда, танкага каршы гранатаны жарып, душманды кырган жана өзү да курман болгон. 2 жолу 3-даражадагы Даңк, Кызыл Жылдыз ордендери жана медалдар менен сыйланган. Түп кыштагында Кайкинге эстелик тургузулган. Анын ысмында мектеп, көчө бар.
Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.