КЫЗЫЛ-СУУ ЧОПО КЕНИ

КЫЗЫЛ-СУУ ЧОПО КЕНИ Чүй облусунун Кемин районунда, Орловка шаарчасынан 25 км түштүктө, деңиз деңгээлинен 1880–2120 м бийикте. 1990-жылы Түндүк Кыргыз геологиялык экспедициясы чалгындаган. Кен­дин калыңдыгы 40 мден 85 мге жетип, палеоген мезгилиндеги чопонун калың катмарынан түзүлгөн. Чопо кызыл түстө, илешчээк, эзилгич (1210–1240°С), жогорку дисперстүү, кум кошулмасы өтө аз (3% чейин), сууда эрүүчү туздар 0,01%ти түзөт, орточо ийкемдүүлүк саны – 12. Технологиялык сыноонун негизинде чопо «125», «175» маркасындагы кыш алууга жарамдуулугу аныктал­ган. Пластифицирлөөдө, бургулоо эриндисин боёк катары колдонсо болот. Баланстагы запасы А категориясы боюнча 332 миң м³, В – 515 миң м³, С – 1555 миң м³.