ГРИШИН

ГРИ́ШИН Иван Александрович [21. 07. 1918, РСФСР, Түркстан АССРи, Жети-Суу (азыркы Чүй) облусу, Пишкек уезди (азыркы Аламүдүн району), Васильевка кыштагы – 13. 12. 2006, Кыргызстан, Бишкек] – гвардия майору, Советтер Союзунун Баатыры (1945). Советтик Армиянын катарына 1938-жылы чакырылып, кенже лейтенанттар мектебин аяктагандан кийин (1942) фронтко жөнөтүлгөн. Улуу Ата Мекендик согушта Суворов ордендүү Кызыл Туулуу 39-гвардиялык аткычтар дивизиясынын 112-гвардиялык Люблинен аткычтар полкунда батальондун командири болуп кызмат өтөп, Түндүк Кавказ, 3-Украин, 1-Белорус фронтторунда салгылашкан.

23. 04. 1945-жылы И. Гришин командалык кылган батальон Шпре дарыясынын батыш жээгине биринчилерден болуп өтүп, плацдармды ээлөө менен башка бөлүктөрдүн жоготуусуз өтүүсүн камсыз кылган. Бул салгылашта И. А. Гришин жеке өзү душмандын бир нече гитлерчилерди жок кылган. Бул эрдиги үчүн ага 31. 05. 1945-жылы Советтер Союзунун баатыры наамы (№ 5795) ыйгарылган. Берлинди штурмалоого катышкан. 1960-жылы майор чининде запаска чыгып, өмүрүнүн аягына чейин Фрунзе шаарындагы В. И. Ленин атындагы машина-куруу заводунда эмгектенген. Ленин, Кызыл Жылдыз, 1–2-даражадагы Ата Мекендик согуш ордендери жана медалдар менен сыйланган.

Ад.: Алымкулов Н. А. Кыргызстанцы – герои Советского Союза и полные кавалеры Ордена Славы: новые факты, имена. Б., 2025.