КЕН ЗАПАСЫН ЭСЕПТӨӨ
КЕН ЗАПАСЫН ЭСЕПТӨӨ – кенташтын курамындагы минералдык сырьёнун сапатын, санын, өлчөмүн аныктоо. Мында кендердин чалгындоо даражасы, орун алуу тартиби, сапаты, саны, өлчөмү, чеги, эл чарбасындагы мааниси, казып алуу мүмкүнчүлүгү, жайгашуу тартиби, жалпы шарты такталат. Кендерди чалгындоонун бардык этабында запасы аныктала берет. Эң алгачкы чалгындоодогу маалыматтар б-ча запасты эсептөө м-н тех.-экон. доклад (ТЭД) даярдалат. Кендин кондициясы түзүлөт. Тийиштүү кенташтын запасы, баалуулугу аныкталат. Бул көрсөткүчтөр кийин тоо-кен мекемелерин долбоорлоодо негизги документ болуп калат. Кендин алгачкы ж-а такталгандан кийинки запасын запас б-ча мамл. комиссия бекитет. Кендин запасы экон. жактан казып алууга жарактуу (баланстык) же азырынча пайдаланууга жараксыз (баланстан тышкары) экендиги аныкталат. Булардын ар бири кен байлыктын чалгындалган даражасына, изилденип чыккан сапатына, казып алуу шартына байланыштуу 4 категорияны (А, В, С ж-а С2) түзөт. Кендин таралышы чектелбей, кенташтын сапаты аныкталбай, жалпы геол. маалыматтарга карап болжолдуу алынган запас прогноздук же геол. запас деп аталат.
Ад.: Смирнов В. Н. и др. Подсчёт запасов месторождений полезных ископаемых. М., 1960; Коган И. Д. Подсчёт запасов и геолого-промышленная оценка рудных месторождений. М., 1974.