КАМАГУЭЙ
КАМАГУЭ́Й – Кубадагы шаар. Камагуэй провинциясынын административдик борбору. Атибонико дарыясынын өрөөнүндө, Гаванадан түштүк-чыгышта жайгашкан. Калкы 309,5 миң (2008); калкынын саны боюнча өлкөдөгү 3-шаар (Гавана, Сантьяго-де-Кубадан кийин). Эл аралык аэропорту бар. 1514-жылы Кубанын губернатору Веласкес де Куэльяр тарабынан негизделген. 1817-жылдан шаар статусуна ээ. 1903-жылдан азыркыдай аталат. Чиркөөлөр, ак сарайлар, театрлар, бир нече ири аянттар сакталган. Илимий-изилдөө мекемелер (анын ичинде информатика ж-а технология башкармалыгы), айлана-чөйрөнү изилдөө борборлору, университетт, китепкана, архив, край таануу музейи, сүрөт галереясы бар. Шаардын өнөр жай ишканалары негизинен айыл чарба продуктуларын белендөөгө адистешкен. Сүт өндүрүү боюнча өлкөдө алдыңкы орунду ээлейт (жылына 70 млн л). Пиво ж-а суусундуктарды куюу өндүрүшү (Кубадагы эң ири), курулуш материалдар, минералдык жер семирткичтер ж-а резинадан буюм жасоочу өнөр жай ишканалары иштейт.