КАРКЫРА

КАРКЫРА – Кырг-н м-н Казакстандын аймагы аркылуу аккан суу, Кеген суусунун сол куйма­сы. Тескей Ала-Тоонун капталынан башталып, түндүктү карай агат. Уз. 69 км, алабынын аян­ты 1790 км². Жогорку бөлүгү Кырг-ндын айма­гында кууш өрөөн аркылуу агып өтөт. Ортоңку бөлүгү – Кырг-н м-н Казакстандын чек арасы; төмөнкү бөлүгү түзөң, саздуу келет. Негизги куймалары: Көк-Жар, Турук, Чоң Жылаңач, Кур-Каркыра, Кичи Жылаңач, Ак-Каркыра, Жел-Каркыра ж. б. 140тан ашык майда куй­масы, жалпы аянты 0,47 км² келген 22 көлү бар. Жылдык орт. чыгымы 15,0 м³/сек. Эң көбү 107 м³/сек, эң азы 2,87 м³/сек. Апрелде кире баштап, октябрь–ноябрда тартылат. Сугатка пайдаланылат.