АРИТМИЯ
АРИТМИЯ (а... ж-a гр. rhythmos – ыргак) – жүрөктүн согуу ыргагынын бузулушу. А-да жүрөктүн кагышынын өтө тез (тахикардия) же жай (брадикардия) согушу сезилет. Ага жүрөк оорулары (миокардит, кардиосклероз), нервдин жүрөктү башкаруу ишинин бузулушу ж. б. себеп болушу мүмкүн. Балдардын, өспүрүмдөрдүн жүрөгүнүн тез-тез кагышы алардын организминин өсүшүнө байланыштуу физиол. өзгөрүү болуп эсептелет. Айрым учурда А. кан айлануунун бузулушуна, жагымсыз сезүү, баш айлануу ж. б. алып келет, кээде оорулууга сезилбейт. Ага себепчи болгон негизги ооруларды дарылап, жүрөктүн бир калыпта согушун калыбына келтирүү керек.