«АЛАШ ОРДО»

‒ 1917‒20-ж. Алаш казак улуттук автономиясынын өкмөтү. «А. О.» (Улуттук Кеӊеш) 1917-ж. 5‒13-декабрда өткөн экинчи жалпы казак курултайында «Алаш» партиясы тарабынан түзүлгөн. Съездде каралган 10 маселенин ичинен эӊ маанилүүсү Алаш автономиясын түзүү ж-а анын өкмөтүн дайындоо болгон. «А. О.» өкмөтүнүн курамында 25 мүчөсү болуп, 10 орун казак-кыргыздардын арасында жашаган башка калктарга берилген, төрагалыгына А. Бөкейханов шайланган. Анын негизги милдети катары Россияда жеӊишке жетишкен соц. рев-ядан Казакстанды коргоо болгон. «А. О.» антисоветтик күчтөр м-н жакындашууга аракеттенип, атаман Дутов м-н байланыш түзүшкөн. Жарандык согушта жеӊишке жеткен Совет өкмөтү «Алаш» партиясы м-н «А. О.» өкмөтүн тараткан. Убагында Совет өкмөтү тарабынан Алаш козголоӊуна катышкандарга кечирим берилгенине карабастан, алар кийин сталиндик репрессиянын курмандыгы болушкан.

А. Жуманалиев.