АК-САЙ МӨҢГҮЛӨРҮ

АК-САЙ МӨҢГҮЛӨРҮ Кыргыз Ала-Тоосунун түндүк тармагы ‒ Аюу-Төрдүн батыш капталындагы жанаша жаткан 2 мөӊгү (Чыгыш жана Батыш). Ала-Арча суусунун алабынан орун алган. Өрөөн тибиндеги мөӊгүлөргө кирет. Чыгыш Ак-Сай мөӊгүсүнүн узундугу 6,2 км, аянты 4,1 км². Мөӊгүнүн башы деӊиз деӊгээлинен 4870 м, этеги 3220 м бийиктикте жатат. Кар чегинин бийиктиги 4120 м. Батыш Ак-Сай мөӊгүсүнүн узундугу 6,4 км, аянты 4,4 км². Деӊиз деӊгээлинен эӊ бийик жаткан жери 4840 м, этеги 3220 м. Кар чегинин бийиктиги 4120 м. Мөӊгүлөр акырындап чегинүүдө. Этек мореналары даана байкалат. Алардан Ак-Сай суусу башталып, Ала-Арчага оӊ тараптан куят.