КАРКЫРА СЫМАЛДАР
КАРКЫРА СЫМАЛДАР (Gruiformes) – куштар түркүмү. Бул түркүмдүн 8 түркүмчөсү бар. Алар буту ж-а моюну узун ири канаттуулар. Чоңунун салмагы 15 кг. КМШда эң кичинеси 2–3 кгга жетет. Жүнү катуу ж-а тыгыз, нык келет. Шыйрагынын ылдый жагында жүнү жок. Канаты кыска ж-а жазы, куйругу кыска. Тумшугу узун ж-а күчтүү. Буттары анча узун эмес, беш манжалуу. Алардын эркеги м-н ургаачысы абдан окшош, кээде ургаачысы эркегинен чоң болот. Дүйнөнүн бардык өлкөсүндө кеңири таралган. Алар негизинен түз жерде, сазда жашайт. Бардыгы моногамдуу куштар, жубу өмүр бою сакталат. Уясын жерге, айрымдары даракка салат. Балапандары тыбыт жүн м-н капталып, көзү ачык чыгат. Тыбыт жүнү кургагандан кийин эле уядан чыгып, энесинин артынан ээрчип жөнөйт. Каркыра сымалдар өсүмдүк, кээ бир түрү жандыктар м-н азыктанат. Каркыра сымалдардын 13 тукуму, 88 уруусу, 214 түрү бар. КМШ өлкөлөрүндө 7 түрү кездешет. 1–2, чанда 3 жумуртка тууйт. Жумурткасын көбүнчө ургаачысы басып чыгарат. Каркыралар – жөжө чыгаруучу куштар. ТКЭСтин Кызыл китебине 16 түрү катталган.