КАРДИОСКЛЕРОЗ
КАРДИОСКЛЕРО́З (кардио... ж-а склероз) – жүрөк-кан тамыр атеросклерозунда жүрөк кан м-н жетишсиз камсыз болгондо ж-а сезгенгенде жүрөк булчуңунун туташтырма тканынын өсүп кетишинен болгон оору. Демейде жүрөктүн кандайдыр бир өнөкөт же катуу кармаган ооруларынан келип чыгат. Ага көбүнчө инфекция – аллергиялык, вирустук ж-а бактериялык миокардиттин кабылдоосунан болгон жүрөктүн таажыча артериясынын атеросклерозу себеп болот. Анын алгачкы ж-а негизги белгилери: адегенде кара күч жумшаганда, кийинчерээк тынч абалда да демигүүнүн пайда болушу; кийин оорулуунун тамыры тез кагат, буту шишийт, боору чоңоёт, өпкө кан тамырларында кан жай жүрүп, дем кыстыгат; жүрөк чоңоёт, жүрөк капкаларынын туташтырма ткандары өсүп, жүрөк кемтигине алып келет. Дарылоодо жүрөк булчуңун кан м-н жабдууну жакшыртуу үчүн кан тамыр кеңейтүүчү дарылар, жүрөктүн начарлашын (жетишсиздигин) жакшыртуучу, кагуу ыргагын оңдоочу каражаттар колдонулат.