ИСАКЕЕВ Баялы
ИСАКЕЕВ Баялы Дыйканбаевич [1897, Россия империясы, Түркстан генерал-губернаторлугу, Жети-Суу обулусу, Пишпек уезди (азыркы Кочкор району), Үкөк өрөөнү – 08. 11. 1937, СССР, Кыргыз ССРи, Фрунзе шаары] – партиялык жана мамлекеттик ишмер; Кыргызстандын алгачкы Конституциясынын авторлору
жана улуттук мамлекетти негиздөөчү, ошондой эле «Манас» эпосун орус тилине которуунун алгачкы демилгечилеринин бири. Нарын шаарындагы орус-жергиликтүү мектеп-интернатын (1916), Ташкенттеги Орто Азия коммунисттик университетин (1923), Москвадагы ВКП(б) БКнын алдындагы партиялык мектепти (1926) бүтүргөн. 1917–1920-жылдарда Кум-Бел-Арал жана Орто-Токой менчик почта бекеттеринде күзөтчү, киречи, бекет башчысы, 1920–1921-жылдарда Үчүкө (Кочкор) болуштугунун аткаруу комитетинин, 1921–1923-жылдарда Нарын уезддик партия комитетинин, 1924–1925-жылдарда Түркстан АССР КП(б) Лепси жана Каракол уезддик шааркомунун, 1926–1927-жылдарда Кыргыз АССР КП(б) Каракол округдук комитетинин бөлүм башчысы, 1927–1928-жылдарда «Кызыл Кыргызстан» гезитинин жооптуу редактору, 1928–1929-жылдарда ВКП(б) Кыргыз обкомунун бөлүм башчысы, 1929–1930-жылдарда Кыргыз АССР жер иштер комиссары, 1930–1933-жылдарда ВКП(б) Кыргыз өкмөтүнүн башчысы, 1933–1937-жылдарда Кыргыз ССР (адегенде АССР) ЭКСтин төрагасы. Кыргыз АССР БАКка (1928– 1937), СССР улуттар советине (1931–1935), СССР БАКка жана анын Президиумуна (1935–1937) мүчө. ВКП(б) БКнын 17-съездинин жана СССР Советинин атайын чакырылган 6-, 7-, 8-съезддеринин делегаты. 1937-жылдарда улутчул-контрреволюциячыл топтун катышуучусу деген жалаа менен камалган жана атуу жазасына тартылган. 1957-жылы акталып, сөөгү 1991‑жылы ариет‑аза күтүү салты менен кайрадан Ата‑Бейит көрүстөнүнө коюлган. Бишкек шаарында эстелиги орнотулуп, ысмы борбордун бир көчөсүнө жана Кочкор районунун бир айылына ыйгарылган.
А. Түркмөнов.