АБАКИРОВ Эмилбек

АБАКИРОВ Эмилбек (18. 03. 1929 - жылы туулган, азыркы Нарын облусу, Кочкор району, Ак-Кудук айылы – 22. 01. 2022, Бишкек) – коомдук жанa мамлекеттик ишмер, советтик профсоюз кыймылынын ишмери. СССР эл депутаты (1989 –1991). Фрунзе кооперативдик техникумун (1949), КМУну (1953) бүтүргөн. 1946–1949-жылдары Чүй районундагы «Шамшы» совхозунда жумушчу, Кара-Дөбө айылдык керек-жарак коомунда эсепчи, 1953–1958-жылдарда Ош педагогикалык институтунда окутуучу, улук окутуучу, комсомол комитетинин секретары, 1955–1959-жылдарда комсомолдун Ош обкомунун секретары, 1959–1960-жылдарда Ош педагогикалык институтунда улук окутуучу, 1960–1970-жылдары Кыргызстан КП Ош обкомунун инструктору, бөлүм башчынын орун басары, бөлүм башчы, 1970–1971-жылдары Кыргызстан КП Ош шааркомунун 1-секретары, 1971–1973-жылдары Кыргызстан КП БКнын уюштуруу-партиялык бөлүмүнүн башчысынын 1-орун басары,1973–1995-жылдары Кыргызстан профсоюздар советинин төрагасы,

1995–1998-жылдары Борбордук Азия, Азербайжан жанa Түркия Республикаларынын профсоюздук борборунун консультациялык кеңешинин башкы катчысы, 1995–2007-жылдары «Достук» мейманканасы АКнын башкы директорунун орун басары, 2007-жылдан башкы директордун кеңешчиси. Октябрь Революциясы, эки Эмгек Кызыл Туу, 3-даражадагы «Манас» ордендери жана КРдин Ардак грамотасы менен сыйланган.