БАБАКУЛОВ

БАБАКУЛОВ Манасбек (1950-жылы туулган, Өзбекстан, Наманган облусу, Кызыл-Рават айылы) ‒ ветеринария илимдеринин доктору (2005). КАЧИни (1976), Москвадагы К. И. Скрябин атындагы ветеринария академиясынын аспирантурасын (1977‒1982) бүтүргөн. Малды асылдандыруу станциясынын (1980‒1985), Жалал-Абад зооветеринария техникумунун директору (1985‒1993) болуп иштеген. 1993-жылдан ЖАМУнун окуу инспекциялык башкармалыгын жетектейт. Паразитология боюнча адис. 40тан ашык илимий эмгектин жана окуу китептердин автору. Эмгектери кой чарбасындагы мите курт ылаӊдарына арналган.