АНТ

АНТ – бузулбас, ыйык шерт, касам; берилгендикти билгизген, жоопкерчиликти алууга милдеттендирген расмий же салтанаттуу убада. Кыргызда антты шерт, касам деп да аташкан. Ата Мекенди коргоо, ага кызмат кылуу, жарандардын өмүрүн коргоо жана башкалар боюнча ыйык милдеттерин ак ниет аткарууга өлкөнүн Президенти, депутаттар, жоокерлер, укук коргоо кызматкерлери, врачтар жана башкалар ант беришет. Ант берүү кээде досчулукта, кандайдыр бир ишти аткарууда да колдонулат. Aнтты жөн эле бере бербейт. Эгер адам ант берсе, аны аткарыш парз. Илгери ант берүүдө анттан тайбаска "кылычтын мизин өбүшүп, нан, куран кармашып, баталашып шерттешкен. «Антымдан жансам; төбөсү ачык көк урсун, төбөсү туюк көр урсун, төшү түктүү жер урсун» деп касам ичишкен. Кээде жалпы түрдө ант берген учурлар да болот.
Ы. Кадыров.