АЛЛИЛХЛОРИД

АЛЛИЛХЛОРИД, х л о р д у у а л л и л, CH₂=CH‒CH₂CI ‒ органикалык бирикме. Молекулалык салмагы 76,53, кескин жыттуу, түссүз суюктук, кайноо t 44,96 °C, тыгыздыгы 938 кг/м³(20 °C). Сууда начар 0,36% (20 °C), көпчүлүк органикалык эриткичте жакшы эрийт. Аллилхлорид кош байланыш аркылуу кошуп алуу жана молекуласындагы хлорду башка атомдордун топтору (OH, NH₂, CN ж. б.) менен орун алмашуу реакцияларына оӊой кирет. Суу, спирт, кумурска к-талары менен азеотроп аралашмасын пайда кылат. Аллилхлорид пропиленди 500‒550°Cде хлорлоодон алынат: CH₂=CH‒CH₃+CI₂→ CH₂=CH‒ ‒CH₂CI+HCI. Ал глицерин, дары-дармек, инсектицид жана кээ бир пластмасса синтездөөдө колдонулат.