АЛИЕВ Кеңеш
АЛИЕВ Кеӊеш (1938-ж. т., Чүй обл., Панфилов р-ну, Чолок-Арык айылы) ‒ хормейстер, профессор (1992), КРдин эл артисти (1992). Кыргыз ССРинин искусствого эмгек сиӊирген ишмери (1974). Фрунзедеги М. Күрөӊкөев атындагы мамлекеттик музыкалык-хореографиялык окуу жайын (1959), Гнесиндер атындагы Москва мамлекеттик музыкалык-педагогикалык институтун (1964) бүтүргөн. 1964‒69-ж. А. Малдыбаев атындагы Кыргыз мамлекеттик академиялык опера жана балет театрында хормейстер, 1969-жылдан башкы хормейстер, бир эле мезгилде Б. Бейшеналиева атындагы Кыргыз мамлекеттик искусство институтунда окутуучу, хор дирижёру кафедрасынын
башчысы. Ал 50дөн ашык опера спектаклдериндеги (мис., «Кармен», «Русалка», «Отелло», «Манас» ж. б.) хорлорду жогорку деӊгээлде даярдаган. 1975-ж. К. Алиевдин жетекчилиги менен Кыргыз радиосунун хору уюшулган. Бир нече медалдар менен сыйланган.