АЛА-АРЧА ЧОПО КЕНИ

АЛА-АРЧА ЧОПО КЕНИ, Т ү н д ү к К а р а - С у у у ч а с т о г у Чүй облусунун Аламүдүн районунда, Төмөнкү Ала-Арча кыштагынан 1,5 км түндүк тарапта, Ала-Арча суусунун боюнда, деӊиз деӊгээлинен 688‒697 м бийиктикте. Кен 1927-жылдан белгилүү. Кен аймагын боз, күӊүрт сары түстөгү лёсс сымал кумайлуу топурак (чопо) жана анын арасындагы шагылдуу кум линзаларынан турган антропоген мезгилинин дарыя чөкмөлөрү түзөт. Чопо катмарларынын жалпы калыӊдыгы 43 м, анын чалгындалганы 4‒8 м. Аянты 52 га жерде кендин запасы В+С₁ категориясы боюнча 3,8 млн м³ (1986). Калган запасы В категориясы боюнча 1180 миӊ м³, С₁ ‒ 2258 миӊ м³, В+С₁ ‒ 3438 миӊ м³. Карьер түрүндө казылып алынган чоподон Бишкектеги «Красный строитель» кирпич заводунда «75‒150» маркасындагы кирпич даярдалат.