АК-ДӨБӨ - Талас облусундагы кыштак
АК-ДӨБӨ - Талас облусунун Бакай‑Ата районундагы кыштак. Ак-Дөбө айыл аймагына караштуу. Талас – Тараз (Казакстан) автомобиль жолунун боюнда, Талас дарыясынын сол жээгинде, деңиз деңгээлинен 1070 м бийиктикте жайгашкан. Райондун борбору Бакай‑Ата кыштагынан 13 км түндүк-чыгыш тарапта. Тараз (Казакстан) темир жол бекетинен 95 км. 1891‑жылы отурукташкан. Калкы 4717 (2022); негизинен дыйканчылыкта жана мал чарбасында эмгектенет. Талас дарыясынан чыгарылган Чоң Талас каналы айылды батыш тарабынан кесип өтөт. Эки орто мектеп, китепкана, бала бакча, амбулатория, турмуш‑тиричилик комбинатынын бөлүмдөрү бар. Улуу Ата Мекендик согушта курман болгондорго эстелик тургузулган. Жеке менчик «Боорукер» үйү ачылган (1994; үй ээси А. Боромбаев). Анда кароосуз калган кары‑картаңдар багылат. Кыштакта КРнын эл сүрөтчүсү Т. Герцен туулган.