АК-БУУРА ЗАКАЗНИГИ
АК-БУУРА ЗАКАЗНИГИ – Ош облусунун Кара-Суу районундагы аңчылык боюнча корук аймак. Ак-Буура суусунун жайылмасын ээлейт. Ош шаарынан жана Папан суу сактагычынан түштүк тарапта жайгашкан. Заказник 1975‑жылы кыргоол, чил жана кекилик уялоочу аймакты коргоо максатында уюшулган. Аянты 10 миң га. Ош шаарынын жанындагы Ак-Бууранын жайылмасынан 2 га жер Ош облустук аңчылык инспекциясына берилип, балык өстүрүүчү көлмөлөр курулган.