АЙБАЛТА
АЙБАЛТА – жоокерчилик куралы. Байыркы темир доорунан эле көп элдер, анын ичинде кыргыздар да урунуп келген. Көрүнүшү жарты ай сымал келип, темирден ар түрдүү өлчөмдө жасалган.
Айбалта ар бир жоокердин тулкусуна чактап, урушта колдонууда эптүү кылып даярдалган. Сабын ыргай, четин, кайың жана башка катуу жыгачтан жасашып, колго токтомдуу болуш үчүн аны быдырлантып, урушта колдон чыгып кетпес үчүн саптын учуна кайыштан бүлдүргү тагылган. Душманды ууландырып өлтүрүү максатында Айбалтанын мизин кээде ууга сугарышкан. Айбалта ат үстүндө да, жөө калганда да урушууга эң ыңгайлуу согуштук куралдардын катарына кирет.