АБУ-ДАБИ

АБУ-ДАБИ (Абу-Заби) – БАЭнин курамындагы кооз жана эң ири эмирлик. Перс булуңун бойлой 400 кмге созулуп жатат. Аянты 67,3 миң км². Калкы 2,1 млн (2011). Негизинен ислам динин тутат. Борбору – Абу-Даби (БАЭнин да борбору). Рельефи түздүктүү. Климаты кургак. Тропиктин климаттан субтропикке өтмө. Жылдык орточо температурасы 26⁰С. Эң суук айы – январь (18⁰С), жылуу айы – август (34⁰). Жылдык жаан-чачындын саны 107 мм. Жамгыр көп жааган ай – декабрь (36 мм). Майдан декабрга чейин жамгыр дээрлик жаабайт. Абу-Дабиде 19-кылымдын орто ченинен 20-кылымдын башына чейин Британиянын протектораты үстөмдүк кылган. 1961-жылдан өз алдынча административдик бирдик, 1971-жылдан БАЭнин курамында. Экономикасынын негизин нефть өндүрүшү түзөт. Нефтини экспорттоодон түшкөн кирешени киши башына бөлүштүргөндө эң жогорку көрсөткүчкө ээ. Саодият аралында 1996-жылы Эркин экономикалык зона түзүлгөндөн тарта, ал эл аралык офшордук финансы борбору. Деңиз курорту иштейт.