КОРУМДУ МӨҢГҮЛӨРҮ (Чоң Алай кырка тоосунда)

КОРУМДУ МӨҢГҮЛӨРҮ – Чоң Алай кырка тоосунун түндүк капталындагы Корумду суусунун төрүндө жайгашкан үч мөңгү (Чыгыш, Ортонку ж-а Батыш Корумду мөңгүлөрү). Ч ы г ы ш Корумду мөңгү­сү татаал өрөөн тибинде. Узундугу 6,2 км, аянты 13,9 км², көлөмү 0,6 км³. Башы деңиз деңгээлинен 5440 м, этеги 3900 м бийикте жатат. Кар чеги­нин бийиктиги 4620 м, абляциясынын аянты 4,0 км². О р т о н к у Корумду мөңгүсү өрөөн тибиндеги мөңгүгө кирет. Узундугу 5,5 км, аянты 3,9 км², көлөмү 0,2 км³. Башы деңиз деңгээлинен 5330 м, этеги 3820 м бийикте жатат. Кар чеги­нин бийикт. 4520 м, абляциясынын аянты 1,8 км². Б а т ы ш Корумду мөңгүсү – өрөөн тибиндеги мөңгү. Узундугу 3,4 км, аянты 4,9 км², көлөмү 0,3 км³. Башы деңиз деңгээлинен 4700 м, этеги 4020 м бийикте жатат. Кар чегинин бийиктиги 4360 м, абляциясынын аянты 1,9 км². Мөңгүлөр­дөн башталган суулардан Кызыл-Суунун сол куймасы – Корумду суусу куралат.