КОКЦИДИОЗ
КОКЦИДИО́З , э й м е р и о з – мал ж-а куштун мите (инвазиялуу) ылаңы; кээде киши да ооруйт. Кокцидия митеси козгойт. Кокцидиоз м-н уй, кой, тоок, чочко, куну айбанат ж-а ит, балык, коён ылаңдайт. Кокцидиоз м-н көбүнчө төл жазында, жайында өз алдынча тоюттанууга өтүү маалында ылаңдап, өзгөчө бөжөк, жөжө көп чыгашага учурайт. Ылаң кокцидиоздун козгогучу м-н булганган жем, чөп, суу, төшөлгө, топурак, шайман аркылуу жугат. Кокцидия боор, бөйрөк, ичегинин эпителий клеткаларында мителейт. Ыландын жашыруун мезгили 3 күндөн 2 жумага чейин. Ылаңдаган малдын шайы кетип, жем, чөп жебейт, ичи көөп, арыктайт, булчуңдары тырышып, шал болот. Алдын алуу чаралары: айлана-чөйрөдө мителерди (ооцисттерди) жок кылуу, ылаңдуу малды бөлүп дарылоо, төлдү бөлүп багуу, жайытты улам алмаштырып туруу, ветеринардык-санитариялык эрежелерди туура сактоо. Дарылоодо статиль, декокс, койден ж. б. дарылар пайдалуу.