КОММЕНСАЛИЗМ
КОММЕНСАЛИ́ЗМ (лат. commensalis – табакташ) – табияттагы бир түрдөгү организмдердин башка бир түрдүн эсебинен, аларга зыян келтирбей жашоосу (азыктануу же чөйрө катары пайдалануусу). Мисалы, эки түрдүн популяцияларынын особдорунун бири-бири м-н болгон мамилелеринде бир түр үчүн пайдалуу, ал эми экинчи бир түр үчүн пайдасы да, зыяны да жок мамилелер. Жаныбарлардын өз ара мамилелеринин мүнөзүнө карата комменализм үчкө бөлүнөт: 1) комменсал башка түрдөгү организмдерди азык катары пайдаланат, мис., качкын-рак ээлеген үлүлдүн ичинде муунак курт жашап, рактын азыгынын калдыктарын жейт; 2) комменсал башка түрдөгү организмге биротоло же убактылуу жармашып жүрөт, мисалы, жабышкак балык соргуч сүзгүчтөрү м-н акула ж. б. ири балыктарга жабышып, алар м-н кошо сүзүп жүрөт; 3) комменсал ээсинин органдарынын ичинде жашайт, мисалы, баканын арткы ичегисинде жашаган айрым инфузориялар ж. б.